ပအိုဝ်းသမိုင်း

ဝါဆိုလနှင့် ၀ါခေါင်လများတွင် သနပ်ဖက်ပင်များကို စိုက်ပျိုးရန် အသင့်တော်ဆုံး အချိန်ပင် ဖြစ်လေသည်။ သနပ်ဖက်ပင်များကို မစိုက်ပျိုးမီ စိုက်ခင်းများကို ပြုပြင်ပေးရ၏။ တန်ဆောင်မုန်းနှင့် နတ်တော်လများတွင် သနပ်ဖက် စိုက်ပျိုးမည့်မြေရိုင်းမှ သစ်ပင်ချုံနွယ် ပိတ်ပေါင်းများကို ခုတ်ထွင် ရှင်းလင်းရ၏။ တပေါင်းလတွင် မီးရှို့လေသည်။ ထိုသို့ပြုလုပ်ပြီးသောအခါ ၀ါဆိုနှင့် ၀ါခေါင်လများတွင် သနပ်ဖက်ပင်များကို စိုက်ပျိုးနိုင်လေသည်။ သနပ်ဖက်ပင်များကို စိုက်ပြီးနောက် အမြစ်မြေတွင် ကုပ်တွယ်ပြီးရှိမှသာလျှင် မြေကိုဆွပေးနိုင်၏။

သနပ်ဖက်ပင်များကို စိုက်ပျိုးရာ၌ နည်းသုံးနည်းဖြင့် စိုက်ပျိုးနိုင်သည်။ ၄င်းတို့မှာ ---
(၁) မျိုးစေ့များကို ပျိုးထောင်ပြီးမှ စိုက်ပျိုးခြင်း
(၂) အကိုင်းများဖြင့် စိုက်ပျိုးခြင်း
(၃) မျိုးစေ့များဖြင့် စိုက်ပျိုးခြင်း တို့ဖြစ်ကြ၏။

ပအိုဝ်းတိုင်းရင်းသားတို့သည် သနပ်ဖက်ပင်များကို မျိုးစေ့များဖြင့် ပျိုးထောင်ပြီးမှသာ စိုက်ပျိုးကြသည်က များ၏။ ဤနည်းသည် ကိုင်းစိုက်ပျိုးခြင်းနှင့် မျိုးစေ့ဖြင့် တိုက်ရိုက်စိုက်ပျိုးခြင်းထက် ပိုမိုသေချာအောင်မြင်၏။ ထို့ပြင် သနပ်ဖက်ရွက်များကိုလည်း စောစီးစွာခူးယူနိုင်၏။

သနပ်ဖက်အကိုင်းများဖြင့် စိုက်ပျိုးခြင်းကို အများအားဖြင့် မပြုလုပ်ကြပေ။ တပို့တွဲ၊ တပေါင်းလတွင် သနပ်ဖက် အကိုင်းများကို ခုတ်ဖြတ်သောအခါ မျိုးကိုင်းများကို ဖြတ်ယူပြီး စိုက်ပျိုးနိုင်သည်။ မျိုးကိုင်းများကို ယူရာ၌ သန်မာထွားကြိုင်းပြီး အသက်ကြီး၍ အနာအဆာကင်းသော ပင်စည်များကို ရွေးချယ်ရ၏။ ထိုအပင်များကို တစ်ပေလောက် ဖြတ်ယူလျှင် အကောင်းဆုံး မျိုးကိုင်းများကို ရနိုင်သည်။

ကြိုတင်ပြုပြင်ထားသော စိုက်ခင်း၊ မြေကွက်လပ်များတွင် မျိုးစေ့များဖြင့်လည်း စိုက်ပျိုးနိုင်၏။ ၀ါဆိုနှင့် ၀ါခေါင်လများတွင် မျိုးစေများကို စူးထိုး၍ စိုက်ပျိုးကြသည်။ ဤသို့မျိုးစေ့များဖြင့် စိုက်ပျိုးခြင်းသည် သနပ်ဖက်ရွက်များကို ခူးရန် အချိန်ကြာမြင့်စွာ စောင့်နေရ၍ မျိုးစေ့ဖြင့် စိုက်ပျိုးခြင်းကို လုပ်ကိုင်လေ့မရှိကြပေ။ မျိုးစေ့ဖြင့် စိုက်ပျိုးခြင်းသည် ရေရှည်အတွက်လည်း အကျိုးမရှိပေ။